Зеленский жанг майдонида танаффус олишга лойиқ эмас
Россия ташқи ишлар вазири Сергей Лавров Украина президенти Владимир Зеленский жанг майдонида вақтинчалик танаффус олишга лойиқ эмаслигини билдирди. Унинг фикрича, Зеленский ҳар қандай ташаббусдан ўз манфаати йўлида фойдаланиб, Украина армиясининг куч тўплаши учун вақт ютишга ҳаракат қилмоқда.
Лавров бу ҳақда Ливан ташқи ишлар вазири Юсеф Ражжи билан ўтказилган матбуот анжуманида Россия ва Украина ўртасида энергетик сулҳга эришилгани ҳақидаги саволга жавоб берар экан, маълум қилди.
«Зеленскийнинг Трамп баёнотидан ҳайратга тушгандек кўриниши фақат бир нарсани англатади: у жамоатчиликка маълум бўлаётган ҳар қандай баёнот, ташаббус ва ғоялардан фойдаланиб, ҳар қандай йўл билан танаффус олишга бўлган манфаатини илгари сурмоқчи. Менимча, у бундай танаффусга лойиқ эмас», — деди Россия ТИВ раҳбари.
Лавровнинг таъкидлашича, Зеленский икки ой давомида куч тўплаш имконияти берилса, сайлов ўтказишга тайёрлигини билдирмоқда. Бироқ Россия вазирининг фикрича, бу вақт ичида Европа Украина Қуролли кучларини ҳарбий ҳаракатларни давом эттириш учун янги қурол-яроғ билан таъминлайди.
Россия президенти матбуот котиби Дмитрий Песков аввалроқ энергетик сулҳ бўйича томонлар ўртасида алоқалар давом этаётганини маълум қилган эди. У Кремль бу масалада хабар беришга арзийдиган маълумот пайдо бўлса, расмий ахборот беришини айтган.
Аввалроқ, шанба куни АҚШ президенти Дональд Трамп Зеленскийни Вашингтоннинг Россиядаги нефтни қайта ишлаш заводларига зарба бермаслик ҳақидаги илтимосларига эътибор бермасликда айблаган эди. Трампнинг таъкидлашича, Украина раҳбари анчадан бери Москва билан тинчлик келишувига эришиши керак эди. Шунингдек, у украиналиклар музокараларга тайёрроқ бўлган раҳбарни сайлаши учун мамлакатда президентлик сайловларини ўтказишни таклиф қилган.
