Макрон яна Павел Дуров иши юзасидан фикр билдирди
Франция президенти Эммануэль Макрон Телеграм асосчиси Павел Дуровнинг Францияга келишидан хабари йўқлигини ва у билан учрашишни режалаштирмаганини айтди.
Аввалроқ Франциянинг Canard Enchaîné нашри ҳибсга олиш чоғида Дуров уни Елисей саройида кутаётганини, у ерда Макрон билан кечки овқатланмоқчи бўлганини айтгани ҳақида хабар берган эди.
“Жаноб Дуровнинг Францияга келганидан мутлақо бехабар эдим… Мен ҳеч кимни таклиф қилганим тўғри эмас… Ўтган ҳафта охирида ҳам, кейинги кунларда ҳам жаноб Дуров билан учрашишим керак эмас эди, Францияга келишидан бехабар эди”, — деди Макрон 29 август куни Белграддаги матбуот анжуманида.
Макроннинг сўзларига кўра, у Дуровга Франция фуқаролигини берганлиги учун “тўлиқ жавобгарликни ўз зиммасига олади”.
“Биз бу қарорни 2018 йилда қабул қилдик ва мен буни тўлиқ асосли деб ҳисоблайман, таниқли тадбиркорлар, спортчилар ва санъаткорларга фуқаролик берилишини тўғри деб биламан”, деди у.
Дуров Россия, Франция, Бирлашган Араб Амирликлари ва Сент-Китс ва Невис фуқаролигига эга. У 2021 йилда “Франция таъсирига ҳисса қўшадиган” “фахрий хорижлик” сифатида француз паспортини олди.
Аввалроқ Макрон Дуровнинг ҳибсга олиниши сиёсий қарор эмаслигини айтган эди.
