Дания Арктикадаги ҳарбий иштирокини кучайтириш учун 2 миллиард доллардан ортиқ маблағ ажратади
Бу қарор АҚШ президенти Дональд Трамп Гренландия устидан назоратни ўрнатишдан манфаатдор эканлигини билдириши фонида қабул қилинди, деб хабар беради Reuters.
Дания душанба куни Арктикадаги ҳарбий иштирокини кучайтириш учун 14,6 миллиард Дания кронасидан (тахминан 2,05 миллиард доллар) фойдаланишини эълон қилди.
Трамп шу ой Гренландия АҚШ хавфсизлиги учун муҳим эканлигини ва Дания муҳим Арктика ороли устидан назоратдан воз кечиши кераклигини айтди.
Мудофаа бюджетини ўн йилдан ортиқ чуқур қисқартирганидан сўнг, ўтган йили Дания ўн йиллик режа доирасида ҳарбий харажатларга 190 миллиард Дания крони (26 миллиард доллар) ажратди, унинг бир қисми Арктикага қаратилган.
Гренландия хавфсизлиги ва мудофааси учун масъулиятга қарамай, Дания бу улкан ҳудудда чекланган ҳарбий ресурсларга эга.
Даниянинг минтақадаги қуролли кучлари ҳозирда тўртта эски кема, Challenger самолёти ва ит чана патрулидан иборат.
Мудофаа вазири Троэльс Лунд Поульсен матбуот анжуманида ҳозирда учта янги кемани молиялаштириш, узоқ масофага учувчисиз учиш аппаратлари сонини икки баравар кўпайтириш, шунингдек, сунъий йўлдош орқали кузатишни молиялаштириш режалаштирилмоқда, деди.
АҚШ армияси аллақачон Гренландия шимоли-ғарбидаги Питуффик космик базасида доимий мавжуд бўлиб, у баллистик ракеталарнинг учирилиши ҳақида эрта огоҳлантириш тизими учун стратегик жой ҳисобланади. Европадан Шимолий Америкага энг қисқа йўл орол орқали ўтади.
