Москвада турар-жой биносининг портлаши натижасида “ДХР бокс федерацияси” раҳбари вафот этди

Армен Саркисян “Донецк Халқ Республикаси бокс федерацияси” деб аталувчи ташкилот раҳбари ҳамда Украина урушида Россия томонида урушаётган “АрБат” (“Арман батальони”) қуролли бўлинмаси асосчиси бўлган. Саркисян, шунингдек, Украина шарқидаги Горловка шаҳри номидан келиб чиққан “Горловский” лақаби билан танилган. ОАВ маълумотларига кўра, у ушбу ҳудудда таъсирга эга бўлган бизнесмен бўлиб, криминал фаолият билан шуғулланган ва Украинадан Россияга қочиб кетган собиқ президент Виктор Янукович тарафдори ҳисобланган.

Аввалроқ бир қатор оммавий ахборот воситалари Армен Саркисян Москвадаги “Алые паруса” турар-жой мажмуасида портловчи қурилма ишга туширилиши натижасида оғир жароҳат олгани ҳақида хабар берган эди.

Саркисян Украинада қидирувга берилган бўлиб, у “Евромайдон воқеалари” пайтида қотилликларни ташкил этишда айбланган.