Зеленский: «Украинада тинчлик ўрнатилиши учун ўз лавозимимни тарк этишга тайёрман»
Украина президенти Владимир Зеленский Украинада тинчлик ўрнатилиши учун ўз лавозимини тарк этишга тайёрлигини айтди.
Бу ҳақда у 23 февраль, якшанба куни бўлиб ўтган матбуот анжуманида маълум қилди.
Унинг қўшимча қилишича, бу Украинанинг НАТОга қўшилиши эвазига мумкин.
«Агар Украина учун тинчлик муҳим бўлса, агар сиз ҳақиқатан ҳам ўз лавозимимни тарк этишимга муҳтож бўлсангиз, мен тайёрман», деди у журналистнинг саволига жавоб бериб.
Зеленский Украина хавфсизлигига 20 йилдан кейин эмас, бугун эътибор қаратаётганини ва «ҳокимиятда ўн йил қолиш» ниятида эмаслигини таъкидлади.
Унинг сўзларига кўра, Украинанинг узоқ йиллар хавфсизлигини таъминлаш – бу унинг орзуси.
Президент АҚШ президенти Дональд Трамп билан урушни имкон қадар тезроқ тугатиш зарурлиги борасидаги фикрига қўшилишини таъкидлади. Унинг қўшимча қилишича, куч билан тинчлик, биринчи навбатда, кучларни Россия томон йўналтиришдир.
