Жаҳон акция бозори қулади
Жаҳон акциялар бозори динамикасини акс эттирувчи MSCI (Morgan Stanley Capital International World Index) глобал индекси кетма-кет иккинчи кун пасайишни давом эттирмоқда. Бунга АҚШ президенти Доналд Трампнинг янги божхона тўловларини жорий этиш ҳақидаги баёноти туфайли вужудга келган савдо зиддиятининг кескинлашуви сабаб бўлмоқда.
3 апрель, пайшанба куни MSCI 5,52 фоиз пасайиб, 544,18 пунктгача тушди. 4 апрелдаги дастлабки савдоларда эса пасайиш давом этиб, яна 1,32 фоизни ташкил этди.
Кечаги кунда АҚШ, Европа ва Осиё биржаларидаги савдолар якунига кўра, бутун дунё бўйлаб компанияларнинг умумий қиймати 3,1 триллион долларга камайди.
Bloomberg маълумотларига кўра, Америка акциялари 2,5 триллион долларга арзонлашди. Stoxx 600 Европа индекси 2 фоизга тушди ва мутахассисларнинг фикрича, бу унинг сўнгги уч йилдаги энг ёмон ҳафтаси бўлиши мумкин. Агентлик томонидан сўровга тортилган экспертлар ўзаро савдо тўсиқлари туфайли бозорлардаги беқарорлик кучайишини башорат қилмоқда.
