Туркия Президентлиги велотурига 27 апрелда старт берилади
Туркия Президентлиги велотури (ТУР 2025) Туркия ва дунёнинг энг муҳим велоспорт мусобақаларидан бири бўлиб, бу йилги 60 тури 27 апрелдан 4 майга қадар Туркиянинг хушманзара йўналишларида бўлиб ўтади ва дунёнинг турли ўлкаларидан энг яхши профессионал жамоалар ҳамда спортчилар иштирок этади.
Туркия Республикаси Президенти, Ёшлар ва спорт вазирлиги ҳамда Туркия Туризмни танитиш ва ривожлантириш агентлиги (ТГА) кўмагида Туркия велоспорт федерацияси томонидан велотурнинг 60 йиллиги муносабати билан нуфузли тадбир ташкил этилиб, у жорий йилнинг 27 апрель куни Анталияда бошланиб, 4 май куни Измирда якунланади. Саккиз кунлик ва саккиз босқичли ушбу турда АҚШ, Германия, Белгия, Хитой, Франция, Нидерландия, Испания, Италия, Қозоғистон, Малайзия, Норвегия, Полша ва Туркия терма жамоалари иштирок этади. Таркибда велоспорт оламидаги энг кучли спортчилар ва истиқболли ёшлар жой олган.
Туркиянинг бой тарихий меросига саёҳат
Ушбу мусобақа дунёнинг йирик спорт тадбирларидан бири сифатида нафақат велосипедчиларнинг маҳоратини синайди. Балки Туркиянинг маданий ва табиий бойликлари ҳамда велосипед туризми имкониятларини бутун дунёга танитади. Зеро мусобақа беш қитъанинг 190 мамлакатида 13 тилдаги жонли эфирлари билан бутун дунё эътиборини қозонган. Велотур маршрути Туркиянинг энг машҳур ва яширин марваридлари бўйлаб давом этади ва спортчилар ҳар бир босқичда апельсин, лимон ва мандарин боғлари, жўка ва тимян хушбўй ҳидли йўллар, қарағай, зайтун ва мастик дарахтлари билан ўралган мафтункор манзаралар орқали ўтувчи йўлларни босиб ўтишади. Бундан ташқари, чой, кофе, симит каби маҳаллий турк таомлари, кўзмунчоқ каби маданий рамзлар халқаро экранларда дунё юзини кўради.
Пойга Турк Ривиерасининг юраги Анталиядан бошланиб, Кемер, Калькан, Фетҳие, Мармарис, Акяка, Айдин, Кушадаси, Селчук ва Чешме бўйлаб давом этади ва Эгей марвариди Измирда якунланади. Анталиядаги биринчи босқичда (132 км) Калеичи кўчалари, Ҳадриан дарвозаси ва Йивли минораси, шунингдек, қадимги Силён ва Белек каби шаҳарнинг тарихий диққатга сазовор жойларидан баҳраманд бўлишади.
Кемер ва Калькан ўртасидаги кейинги босқичда (167,4 км) велосипедчилар Патара пляжи, Янарташнинг афсонавий алангаси, Ликия марваридлари Мйра, Финике, Демре, Каш ва рамзий Капуташ пляжидан ўтишади. Фетҳие-Мармарис босқичидаги (175,9 км) Келебеклар водийси, Ўлик денгизи, йўқолиб бораётган cаретта cаретта тошбақалари ва Далян дельтасининг сеҳри пойгага ўзгача завқ бағишлайди.
Тўртинчи босқич Мармарис ва Акяка (115,4 км) йўналиши бўлиб, у денгиз манзарали ўрмон йўллари, елканли маршрутлар ва кайт-сёрфинг пляжлари бўйлаб давом этади. Мармарис-Айдин босқичида (151 км) қадимги Афродисиас майдони ва Эгейнинг рамзий зайтун боғлари бўйлаб юрилади. Кушадаси-Селчук босқичи (161,4 км) ЮНEСКО майдони Эфес, Артемида ибодатхонаси ва Биби Марям уйини, Селчук-Чешме йўналиши (144,2 км) эса Ширинже қишлоғи, Сефериҳисар ва Чешмени ўз ичига олади. Финал Чешме-Измир босқичи (105,7 км), Измир соат минораси, маҳаллий лаззатлар, қадимий жойлар ва минтақанинг машҳур узумзорлари билан якунланади.
Туркия Президентлиги Велосипед Тури Халқаро Велосипедчилар Уюшмаси (УCИ) Европа Турлари тақвимида “ПроСериес” тоифасига киритилган пойгалардан бири бўлиб, бу Туркиянинг глобал велоспортдаги муҳим ролини таъкидлайди. Қолаверса, мамлакатнинг велосипед имкониятларини, хавфсиз тўхташ жойи, велосипедларни тозалаш ва таъмирлаш хизматлари каби кўплаб қулайликларга эга қулай турар жойларни ҳам намойиш этади.
