Украина хакерлар учун осон нишонга айланди
Bloomberg хабар беришича, АҚШ томонидан қўллаб-қувватлаш тўхтатилгандан сўнг Украинанинг киберхавфсизлиги заифлашган.
Нашр маълумотларига кўра, асосий шартномалар бекор қилинган ёки тўхтатилган, инфратузилмани ҳимоя қилиш учун ускуналар ва дастурий таъминот етказиб бериш амалга оширилмаган.
Илгари АҚШ Украинага Россиянинг энергетика тизими, ҳукумат идоралари ва банкларга қарши уюштирган киберҳужумларига қарши туришда ёрдам берган эди. Фақатгина АҚШ Халқаро тараққиёт агентлигининг ўзи ушбу мақсадлар учун 200 миллион доллардан ортиқ маблағ ажратган. Қўллаб-қувватлаш мутахассисларни ўқитиш, техника етказиб бериш ва муҳим объектларни ҳимоя қилишни ўз ичига олган.
2025 йил январидан бошлаб АҚШ ёрдамнинг катта қисмини, шу жумладан разведка маълумотлари алмашинувини тўхтатди. Bloomberg манбаларига кўра, Америка маблағлари Украина киберхавфсизлигини қўллаб-қувватлашнинг энг йирик манбаи бўлган.
Шу ҳафта АҚШ витсе-президенти Жей Ди Венс, агар Москва ва Киев шартларни қабул қилмаса, Вашингтон тинчлик жараёнидан чиқиб кетиши мумкинлигини маълум қилди. Бу эса киберҳамкорликни янада мураккаблаштириши эҳтимоли бор.
