Британия Украинага қўшин юбориш режасидан қайтди
Буюк Британия Украинага муҳим тинчликпарвар кучларини жойлаштириш режаларини қисқартирди, деб ёзади The Times.
Газетага кўра, Британия ҳарбий қўмондонлиги 30 минг кишилик контингентни юбориш ғоясидан воз кечган. Бунинг ўрнига ҳаво хавфсизлигини таъминлаш, Украина қўшинларини тайёрлашни қўллаб-қувватлаш ва Қора денгизни миналардан тозалаш каби “реалистик миссия” таклиф қилинмоқда.
13 август куни АҚШ президенти Доналд Трамп ва Европа Иттифоқи етакчилари билан видеоконференсия орқали суҳбатдан сўнг Буюк Британия бош вазири Кир Стармер Буюк Британия ва Европа давлатлари ўт очишни тўхтатиш тўғрисидаги келишувга эришилгандан сўнг Украинага “қўллаб-қувватловчи кучларни” жойлаштириш бўйича оқилона ҳарбий режалари борлигини айтди, деб ёзади газета.
Стармернинг сўзларига кўра, Трампнинг саъй-ҳаракатлари туфайли Украинада уч ярим йиллик урушдан сўнг ўт очишни тўхтатишга эришиш имконияти мавжуд.
