Макрон: Исроил ўз нуфузини йўқотди
Франция Президенти Эммануэль Макрон Ғазо секторидаги ҳарбий операцияси туфайли Исроил халқаро ҳамжамият кўз ўнгида ўз нуфузини йўқотиб бораётганини таъкидлади.
Politico нашрининг ёзишича, Франция Президенти Эммануэль Макрон Ғазо секторидаги ҳарбий ҳаракатлари учун Исроилни кескин танқид қилди.
Унинг таъкидлашича, Исроилнинг ҳаракатлари фақатгина фожиали оқибатларга олиб келмоқда ва мамлакатнинг халқаро имижига жиддий зарар етказмоқда.
«Сиз фуқаролар орасида шунчалик кўп қурбонлар келтирмоқдасизки, натижада нафақат минтақада, балки бутун дунё жамоатчилиги назарида ҳам Исроилнинг обрўси ва имижи тубдан йўқолмоқда», — деди Макрон.
Унинг сўзларига кўра, Исроилнинг ҳарбий кампанияси «муваффақиятсизликка учраган», ва халқаро ҳамжамият танқидини янада кучайтирган.
Аввалроқ Европа комиссияси Исроилнинг «Горизонт Европа» дастуридаги иштирокини қисман тўхтатиш таклифини билдирган эди. Ушбу дастур илмий тадқиқотлар ва стартапларни молиялаштиради.
Шунингдек, Брюсселда Исроил билан савдо келишувини тўхтатиб туриш имконияти муҳокама қилинмоқда. Бу қарор Ғазода олиб борилаётган уруш билан боғлиқ.
2023 йил 7 октябрдан бери Исроил зарбалари натижасида 65 141 нафар фаластинлик ҳалок бўлган, 165 925 киши яраланган.
2024 йил 18 мартда оташкесим бузилганидан кейин яна 12 590 нафар фаластинлик ҳалок бўлган, 53 884 киши яраланган.
2024 йил 27 майдан бошлаб инсонпарвар ёрдам тарқатиладиган ҳудудларга қилинган ҳужумларда 2 513 нафар инсон ҳалок бўлган, 18 414 киши жароҳат олган.
Исроил Бош вазири Биньямин Нетаньяху аввалроқ армия Ғазо сектори тўлиқ оккупация қилинишини режалаштираётганини маълум қилган эди.
📌 Фаластин манбаларига кўра, Исроил армияси ҳудудни босиб олишни кенгайтириш ва мустаҳкамлашга қаратилган режани амалга оширишга киришган.
