Кубанда электропоезднинг учта вагони юриб кетаётганида ёниб кетди
Краснодар 1 – Новоминская йўналиши бўйича ҳаракатланаётган электропоезднинг учта вагони Новоминская ва Стародеревянковская станциялари оралиғида аланга олди. Бу ҳақда вилоят Фавқулодда вазиятлар бошқармаси маълум қилди.
Аланга сўнгги учта вагонни қамраб олган бўлиб, ёнғин майдони 200 квадрат метрни ташкил этди.
Йўловчилар эвакуация қилинган.
«Звезда» нашрининг хабар беришича, электропоезд тўлиқ тезликда кетаётганида ёнғин бошланиб, бу лаҳза видеога муҳрланган.
Тасвирларда қора тутун билан ўралган электропоезд излар бўйлаб ҳаракатланаётгани кўринади.
Ёнғин оқибатида жароҳатланганлар ва ҳалок бўлганлар йўқ. Натижада йўловчиларни туман маъмуриятининг автобуси станцияга етказиб қўйди.
Ёнғин аллақачон бартараф этилган. ФВВ томонидан олинган тасвирларга кўра, вагонларнинг ичи бутунлай куйиб кетган.
Ёнғиннинг келиб чиқиш сабаби ҳозирча маълум қилинмаяпти – буни терговчилар аниқлайдиган бўлди.
