Францияда фермерлар норозилик уюштирмоқда
Француз фермерлари Европа Иттифоқи (ЕИ) ва Жанубий Америка умумий бозори (Меркосур) ўртасида имзоланган эркин савдо келишувига қарши Версал саройи олдида тракторларда норозилик намойиши ўтказди.
Мамлакатнинг етакчи фермерлар уюшмаларидан бири — FNSEA чақириғига жавобан фермерлар Париждан 20 километр узоқликда жойлашган Версал шаҳри марказида йиғилди. Улар тарихий сарой олдига тракторларда кириб келиб, адолатсиз рақобатга олиб келиши мумкин бўлган келишувдан воз кечишни талаб қилди.
Намойишчиларнинг қўлларида «Версалда деҳқонлар қўзғолони яна бошланади» деган ёзувли байроқ ҳам бўлди.
Меркосур билан келишувга қаршилик
Фермерлар Европа Иттифоқи ва Меркосур ўртасидаги келишувга кўра, Жанубий Америкадан қишлоқ хўжалиги маҳсулотлари импортини енгиллаштиришга қарши чиқишмоқда. Улар бу маҳсулотлар Европа стандартларига жавоб бермаслигини таъкидлаб, таркибида генетик модификация қилинган организмлар (ГМО), пестицидлар ва ўсиш гормонлари бўлган товарлар аҳоли саломатлиги учун хавфли эканини билдирмоқда.
Шунингдек, Жанубий Америкада санитария ва экологик меъёрлар юмшоқроқ, меҳнат харажатлари эса камроқлиги боис, бундай маҳсулотлар Европа бозорида маҳаллий ишлаб чиқарувчилар учун адолатсиз рақобат яратиши қайд этилмоқда.
Келишув тарихи
ЕИ ва Меркосур 2000-йилда эркин савдо келишуви бўйича музокараларни бошлаган, 2019-йилда эса келишув эълон қилинган эди. Бироқ ҳужжат ҳали имзоланмаган ва ратификация қилинмагани сабабли кучга кирмаган.
