Украина Япония билан келишган ҳолда Хитой компанияларига санкция қўллади
Украина президенти Владимир Зеленский Россия, Хитой, Қозоғистон ва бошқа давлатлардан саккиз жисмоний ва 14 юридик шахсга нисбатан санкциялар жорий қилди.
Тегишли фармон Украина президенти девони сайтида эълон қилинди.
Жисмоний шахслар орасида Россиянинг етти фуқароси, жумладан, «Алроса» бош директори Павел Маринчев, Тула патрон заводи директори Сергей Лукин ва КХДРнинг KOMID компанияси вакили Рим Йон Хюк бор.
Юридик шахслар қаторига Россиянинг еттита ишлаб чиқарувчи компанияси, тўртта Хитой фирмаси ва Туркия, Қозоғистон ва Сейшел оролларидан биттадан компания киради. Ҳужжатда айтилишича, бу санкциялар Япония билан келишилган.
Шунингдек, жорий йилнинг июнь ойидан буён АҚШ, Канада, Буюк Британия, Япония ва ЕИ билан санкцияларни синхронлаштириш доирасида Киев 281 жисмоний ва 633 юридик шахсга нисбатан чекловлар жорий этгани қайд этилган.
