Кремл Трампнинг “фронт чизиғини музлатиш” ҳақидаги баёнотларига изоҳ берди
«Бу мавзу Россия-АҚШ муносабатлари давомида турли жиҳатлар билан бир неча бор кўтарилган ва Россия томони ҳар сафар жавоб берган. Бу жавоб яхши маълум: Россия позициясининг изчиллиги ўзгармайди», – деди Россия президенти матбуот котиби Дмитрий Песков журналистларнинг тегишли саволига жавобан.
Аввалроқ Доналд Трамп Украина ва Россия ҳарбий ҳаракатларга якун ясаш учун ҳозирги фронт чизиғида урушни тўхтатиши кераклигини айтган эди.
Ўтган ҳафта эса Украина президенти Владимир Зеленский Вашингтонда Оқ уй раҳбари билан музокаралар ўтказди ва унга ҳам худди шундай таклиф берилди. Шундан сўнг, Ғарб оммавий ахборот воситалари ўз манбаларига таяниб, ушбу учрашувда Трамп Зеленскийни ўт очишни тўхтатиш ва Россия армиясининг Запороже ҳамда Херсон вилоятларидаги фронт участкаларидан қисман олиб чиқилиши эвазига Украина қўшинларини Донецк вилоятидан олиб чиқишга рози қилишга урингани ҳақида хабар берди.
Зеленский бундай келишувни мутлақо рад этди. Россия эса ўзига қўшиб олишга уринаётган ҳудудлардан Украина қўшинларининг олиб чиқиб кетилишни талаб қилишда давом этмоқда.
