НАТО бош котиби: Путинда пул ҳам, ғоя ҳам, куч ҳам қолмаяпти…
НАТО бош котиби Марк Рюттенинг таъкидлашича, Владимир Путин Украинадаги фронтда эришган ҳар бир кичик ютуғи учун жуда катта нарх тўламоқда. Унинг сўзларига кўра, Россиянинг ресурслари тобора камайиб, ҳарбий қудрати етишмаётгани кўзга ташланмоқда, деб хабар берди BBC.
Рютте Лондонда бўлиб ўтган «кўнгиллилар коалицияси» йиғилишидаги матбуот анжуманида шундай деди:
«Путиннинг тажовузи юз минглаб россияликларнинг ҳаётига зомин бўлмоқда. Украина эса жасорат билан қаршилик кўрсатмоқда ва бизнинг ёрдамимиз натижа бермоқда. Ҳақиқат шундаки, Путинда на пул, на аскар, на ғоя қолмоқда».
НАТО раҳбарининг фикрича, фронтдаги вазият шундан далолат бермоқдаки, Россия армияси катта йўқотишлар эвазига ҳам фақат майда ютуқларга эришмоқда. Бу эса ҳарбий операциялар стратегияси самарасиз эканини яна бир бор намоён этмоқда.
Шу билан бирга, Рютте АҚШ президенти Доналд Трампнинг фронт чизиғида жанговар ҳаракатларни вақтинча тўхтатиш ҳақидаги фикрини қўллаб-қувватлади. Унинг таъкидлашича, «адолатли тинчликка эришиш учун Россияга нисбатан босимни кучайтириш вақти келди».
Рютте Европа иттифоқи ва Канаданинг Украинага қўшимча ҳарбий ёрдам ажратиш ҳақидаги қарорини ҳам ижобий баҳолади. «Жанг майдонидаги воқеалар кўрсатмоқдаки, Украинага берилаётган қўллаб-қувватлаш фойда бермоқда. Биз бу йўлда тўхтамаслигимиз лозим», деди НАТО бош котиби.
Унинг бу каби баёнотлари илк марта эмас. 16 октябрда у НАТО давлатларининг иқтисодий ва ҳарбий жиҳатдан Россиядан анча устун эканини таъкидлаганди.
«Биз Россиядан йигирма беш баробар каттамиз. НАТО мамлакатларининг умумий иқтисодиёти 50 триллион долларга етса, Россияники бор-йўғи икки триллион. Бу Техас штатининг иқтисоди билан бир хил даражада», деган эди у.
Марк Рютте таъкидлаганидек, Ғарб мамлакатлари Россиянинг салоҳиятини ортиқча баҳоламаслик керак. «Москва кучли кўринади, лекин унинг имкониятлари чегараланган. Биз ягона мақсад сари бирлашган ҳолда Украинага ёрдам берсак, бу можарога нуқта қўйишимиз мумкин», деди у.
