Интернетдаги адоқсиз баҳслар жамият учун хатарли иллат
Қозоғистон президенти Қосим-Жўмарт Тўқаев 25 октябрь – Республика куни муносабати билан ўтказилган тантанали маросимда мамлакат аҳолисини бирдамлик ва меҳр-оқибатга чорлади. Давлат раҳбарининг сўзларига кўра, фуқароларнинг ўзаро ҳурмат ва дўстона муносабати — тараққиётнинг асосий кафолатидир, деб хабар берди tengrinews.kz.
Тўқаевнинг таъкидлашича, мамлакатда тинчлик ва барқарорликни сақлаш учун ҳар бир инсон нафақат ўз манфаати, балки бутун жамиятнинг манфаати ҳақида ҳам ўйлаши лозим. «Бошқаларнинг меҳнатини қадрламаслик, фикрини инкор этиш ёки кимнидир ёмонотлиқ қилиш — маданий жамият учун бегона ҳолатдир. Бундай иллатларга жавобгарлик бўлиши шарт», — деди у.
Президент айниқса интернет муҳокамаларидаги ахлоқий қиёфага эътибор қаратди. Унинг таъкидлашича, ижтимоий тармоқларда бирор мавзу атрофида бошланган баҳслар кўпинча ҳақорат ва адоватга айланиб кетмоқда. «Бу ҳолат — жамиятнинг энг хавфли касалликларидан бири. Биз бу иллатдан халос бўлишимиз керак», — деди давлат раҳбари қатъий баёнот билан.
Қозоғистон етакчиси, шунингдек, мустақиллик санасини халқ учун муқаддас кун сифатида эътироф этди. У 1990 йил 25 октябрь куни қабул қилинган давлат мустақиллиги тўғрисидаги декларация Қозоғистоннинг янги тарихи учун пойдевор бўлганини эслатди.
Тўқаев мамлакатнинг кейинги йиллардаги ютуқларига ҳам тўхталиб ўтди. Унинг сўзларига кўра, Қозоғистон иқтисодий ўсиш, ижтимоий соҳа ва таълим тизимида сезиларли натижаларга эришган. Шу билан бирга, у ўтмиш сабоқларини унутмаслик зарурлигини алоҳида таъкидлади.
Президент буюк мутафаккир Абиш Кекилбаевнинг сўзларини эслаб, миллат ўз тарихи ва қаҳрамонларига ҳурмат билан қарай олсагина келажакка ишонч билан юз тута олишини айтди.
«Биз ҳар бир босқичда халқимиз тарихи ва уни яратган шахсларга миннатдорлик билдирамиз. Улар бизнинг келажак сари йўлимизни ёритиб туради», — деди у.
Маросим сўнггида Тўқаев барча фуқароларни юрт равнақи ва бирдамлик йўлида меҳнат қилишга чақирди. Унинг сўзларига кўра, Қозоғистоннинг гуллаб-яшнаши фақат жамиятнинг бирликда ҳаракат қилиши билан таъминланади.
