«Москва ер юзидан “супуриб ташланади”
Путин NATO давлатларига қарши ядровий ёки оддий қурол ишлатадиган бўлса, Москва ер юзидан “супуриб ташланади”, деди Белгия мудофаа вазири.
Тео Франкен бу сўзларни Россия президенти Владимир Путиннинг «Украинага Tomahawk ракеталари берилиши Россиянинг кескин жавоб чораларига сабаб бўлиши» ҳақидаги таҳдидларига жавобан айтди.
«Путин худди шундай гапларни Финландия ва Швеция NATO’га қўшилганида ҳам, биз Украинага танклар, ракеталар, F-16 самолётларини берганимизда ҳам айтганди. Бундан шундай хулоса қилиш мумкин: биз таҳдидларга бўйсунмаслигимиз лозим. Булар ҳам Путиннинг “қизил чизиғи” эди, аммо у нима қилди? Ҳеч нарса. Агар у ядро қуролини қўлласа, биз Москвани ер билан битта қиламиз, у буни жуда яхши билади», — деди Белгия Мудофаа вазирлиги раҳбари De Morgen газетасига берган интервюсида.
Франкен, шунингдек, Брюсселга ядровий бўлмаган ракета йўналтирилишидан ҳам қўрқмаслигини айтиб, бундай ҳолатда ҳам Москва ер билан яксон қилинишини таъкидлади.
