Япон лотереяда 300 млн рубль ютиб олган ва пулларни хотинидан яширган
Япониялик 66 ёшли пенсионер лотереяда 600 млн иен (тахминан 300 млн рубль) ютиб олди. Эркак пулларни хотинидан яширишга қарор қилган ва кейинчалик бундан афсуслана бошлаган, деб ёзади South China Morning Post.
Пенсионернинг сўзларига кўра, унинг рафиқаси ҳар доим «ўта тежамкор» бўлган. Эркакнинг эслашича, тўйдан кейин аёл унга пиво ичишни тақиқлаган ва фақат эски арзон машина сотиб олишга рухсат берган. Эр ва хотиннинг умумий нафақаси ойига 300 минг иена (150 минг рубль) бўлиб, уларнинг аксарияти жамғарилган ёки болаларнинг таълимига сарфланган.
Эркак ютуқдан хабар топгач, хотинига ёлғон гапиришга қарор қилди. У хотинига бор-йўғи 5 млн иена (2,5 млн рубль) ютганини ва уни уйни таъмирлашга сарфлашини айтган.
Эркак яширинча люкс автомобиль сотиб олган, бир неча бор иссиқ булоқли курортларда дам олган ва Япония бўйлаб саёҳат қилган, атиги олти ойда 18 млн иен (9 млн рубль) сарфлаган. Пенсионер шубҳа уйғотмаслик учун ҳар куни метрода автотураргоҳга борган, у ерда янги машинасини қолдирган, эски кийимларни кийган ва одатий мулоқот доирасидан узоқлашган.
Тез орада эркакда ўзига хослик инқирози бошланди. Шунингдек, у ажрашиш ва банкротликдан кейин ёлғиз вафот этган отасини тез-тез эслай бошлади.
«Агар бу пуллар менинг ўз кучим билан топилган бўлса, мен улар билан фахрланган бўлардим. Аммо меҳнатсиз келган бойлик нохуш хотираларни уйғотади ва ҳаётимни ларзага солади,» – деди эркак. У деярли 500 млн иенни суғуртага қўйишга қарор қилди, олувчилар сифатида хотини ва болаларини кўрсатди.
