Дунёнинг энг гавжум аэропортлари рўйхати эълон қилинди

Дунёдаги йирик халқаро аэропортлар орасида АҚШнинг Жоржия штатида жойлашган Атланта—Ҳартсфилд-Жексон аэропорти яна бир бор ўз устунлигини намойиш этди. 2024 йил якунига кўра, бу аэропорт 108 миллиондан ортиқ йўловчига хизмат кўрсатиб, мутлақ рекорд ўрнатди.

Атлантанинг бундай юқори кўрсаткичларга эришишига бир нечта омиллар таъсир қилган. Биринчидан, у АҚШ ҳудудининг тахминан 80 фоиз қисмига 2–3 соатлик парвоз масофасида жойлашган. Бу ердан дунё бўйлаб 225 та шаҳарга тўғридан-тўғри парвозлар амалга оширилади. Антарктидадан ташқари барча қитъаларга рейслар мавжуд. Аэропорт трафигининг катта қисми — тахминан 85 фоизи ички йўналишлар ҳиссасига тўғри келади.

Шунингдек, Атланта аэропортида дунёдаги энг улкан автоматлаштирилган багаж тизими ишлайди. 100 километр узунликдаги конвейерлар соатига 60 мингтa жомадонни саралаш имконига эга. Йўловчилар эса терминаллар орасида SkyTrain тезюрар поезди орқали ҳаракатланишади.

Рейтингдаги иккинчи ўринни Дубай халқаро аэропорти эгаллади — йил давомида 92,3 миллион йўловчига хизмат кўрсатилган. Кейинги ўринларда эса АҚШнинг Даллас/Форт-Уэрт (85 млн йўловчи), Токиодаги Ҳанеда, Лондоннинг Ҳитроу аэропортлари қайд этилган.

Юк ташиш бўйича эса етакчилик Гонконг аэропортига тегишли — бир йилда 5 миллион тоннадан ортиқ юк қайта ишланган.