АҚШнинг Украина учун хавфсизлик кафолатлари тинчлик битими имзоланишига боғлиқ
АҚШ Давлат котиби Марко Рубио Европа иттифоқчиларига Украина учун хавфсизлик кафолатлари фақат тинчлик битими имзолангандан кейингина муҳокама қилинишини очиқ айтди. Бу ҳақда Politico нашри вазият билан таниш бўлган икки европалик дипломатга таяниб хабар бермоқда.
Дипломатларнинг хабар беришича, Рубио Европа вакилларига Вашингтоннинг Украина бўйича позициясини баён қилган.
Рубионинг таъкидлашича, АҚШ Украинага ҳар қандай хавфсизлик кафолатларини Россия билан келишув тузилгандан кейингина беришга рози бўлади, дейди дипломатлар. Уларнинг айтишича, бу талаб АҚШ томонидан яқинда Киевга тақдим этилган сиёсий ва дипломатик таклифларда ўз аксини топган.
Бошқа бир европалик расмий Рубио Вашингтон учун хавфсизлик кафолатларининг муҳимлигини таъкидлагани ва бу масала бошқа музокара мавзуларидан алоҳида кўриб чиқилаётгани ҳақида хабар берди. Шунингдек, у АҚШ маъмурияти барча асосий масалалар бўйича кенг қамровли ва тезкор келишувга эришиш тарафдори эканини таъкидлади.
Айни пайтда АҚШ Давлат департаменти матбуот котиби Томми Пиготт бу даъволарни рад этиб, Рубиога оид баёнотлар «тўғри эмас»лигини айтди.
«Котиб Рубио ва Трамп маъмурияти хавфсизлик кафолатлари тинчлик келишувининг бир қисми бўлиши кераклигини очиқ ва шахсий тарзда очиқ айтди», – деди у.
