Қора денгизнинг Туркия соҳиллари яқинидаги қисмида Россия “соя флоти”га тегишли икки кема ёниб кетди
Бу ҳақда 28 ноябр куни кечқурун Туркия оммавий ахборот воситалари хабар берди.
Ёниб кетган кемалардан бири Ҳиндистондан Россияга йўл олган Kairos нефт танкери бўлган. Маҳаллий порт бошқармаси маълумотига кўра танкер қирғоқдан 28 денгиз миляси масофасида минага дуч келган. Туркия денгизчилик бошқармаси бу маълумотни тасдиқлаб, кема бортида “ташқи таъсир” туфайли ёнғин келиб чиққанини ва ундан 25 киши эвакуация қилинганини билдирди.
Орадан кўп ўтмай, Россияга йўналган Virat танкеридаги ёнғин ҳақида хабар берилди. Кема экипажи дарҳол эвакуация қилинган. Туркия расмийлари бу ҳодиса тафсилотларини очиқламади, аммо ҳар иккала танкер ҳам юксиз бўлганини билдирди.
Kairos ҳам, Virat ҳам Гамбия байроғи остида сузади. Ушбу танкерлар Россия томонидан Украинага ҳужум бошланганидан кейин жорий этилган нефт санкцияларини четлаб ўтиш учун фойдаланилади, шунинг учун “соядаги флот” деб аталадиган кема гуруҳига мансуб, деб ҳисобланади. Ушбу танкерлар Ғарб санкциялари рўйхатига киритилган.
