AFP: АҚШ ва Украина делегациялари учрашуви якшанба куни Флоридада бўлиб ўтади, унда Рубио ҳам иштирок этади

Агентликнинг америкалик расмийга таяниб хабар беришича, АҚШ давлат котиби Марко Рубио ва президент Доналд Трампнинг махсус вакили Стив Уиткофф якшанба куни Флоридада Украина делегацияси билан учрашиб, Вашингтоннинг Украина-Россия урушини тўхтатиш бўйича режасини муҳокама қилади. Учрашувда Трампнинг куёви Жаред Кушнер ҳам қатнашади.

Марко Рубио ўтган дам олиш кунлари Женевада украиналик расмийлар билан бўлиб ўтган маслаҳатлашувларда ҳам иштирок этган эди.

Аввалроқ Украина президенти Володимир Зеленский Рустем Умеров бошчилигидаги Украина делегацияси тинчлик режасини муҳокама қилиш учун Қўшма Штатларга йўл олганини маълум қилган эди.