Пентагон раҳбари гиёҳванд моддалар контрабандаси гумон қилинган қайиққа қарши амалиёт чоғида ундаги барча одамларни ўлдиришни шахсан буюрган
Пентагон раҳбари гиёҳванд моддалар контрабандаси гумон қилинган қайиққа қарши амалиёт чоғида ундаги барча одамларни ўлдиришни шахсан буюрган — Тhe Washington Post.
Нашр манбаларига кўра, Пит Ҳегсет гиёҳванд моддалар ташишда гумон қилинган қайиққа берилган зарбадан кейин тирик қолган икки нафар денгизчини ҳам йўқ қилиш бўйича оғзаки буйруқ берган. Ушбу амалиётда АҚШ денгиз флотининг SEAL Team 6 махсус бўлинмаси иштирок этган.
«Тирик қолганларни йўқ қилиш буйруғи ҳарбий жиноят ҳисобланади ва агар бу буйруқни Пентагон раҳбари бергани тасдиқланса, у суд қилиниши мумкин. Бироқ, буйруқни Пит Ҳегсет эмас, адмирал Френк Брэдли берган бўлиши ҳам эҳтимолдан холи эмас. Айнан шу буйруғи учун Брэдлининг лавозими кўтарилгани бўлиши мумкин», дея ёзмоқда The Washington Post.
Ушбу даъволарга жавобан Ҳегсет The Washington Post’ни фейк хабар тарқатишда ва АҚШ армиясини обрўсизлантиришда айблади.
«Мақолада тилга олинган зарба АҚШ қонунларига ва халқаро ҳуқуққа тўлиқ мос келади. Вашингтон энди террорчиларни йўқ қилишни бошлади”, — деди у.
