Польша президенти Венгрия бош вазирининг Москвага ташрифидан кейин у билан учрашишдан бош тортди
«Бош вазир Виктор Орбаннинг Москвага ташрифи ва унинг мазмуни сабабли, президент Карол Навроцкий Венгрияга ташриф дастурини фақат Эстергомдаги “Вишеград гуруҳи” давлатлари президентлари саммити билан чеклашга қарор қилди. Президент Навроцкий Европа хавфсизлиги барча масалаларда, жумладан энергетика соҳасида ҳам ҳамжиҳатликдаги ҳаракатларга боғлиқ, деган фикрда», дейилади Полша президенти девони баёнотида.
Польша президенти Карол Навроцкийнинг Венгрияга икки кунлик ташрифи 3 декабрда бошланади, Орбан билан унинг учрашуви Будапештда бўлиши керак эди.
Венгрия бош вазири Виктор Орбан 28 ноябр куни Москвага борган ва Россия президенти Владимир Путин билан учрашганди.
Маълумот учун, “Вишеград гуруҳи”га Марказий Европада жойлашган Польша, Чехия, Венгрия ва Словакия давлатлари аъзо.
