Венесуэла ҳукумати АҚШ томонидан бевосита ҳужум ҳолатида ҳимояланиш учун икки хил ҳаракат режасини кўриб чиқмоқда
Агентлик манбаларига кўра, биринчи вариант партизанлик шаклидаги қаршиликни назарда тутади. Венесуэлалик юқори мартабали амалдорлар буни «узоқ муддатли қаршилик ҳаракати» деб атамоқда.
Бу сценарийда кичик ҳарбий гуруҳлар қўпорувчилик ҳаракатлари ва бошқа партизанлик амалларини бажариши керак бўлади. Манбалардан бирининг айтишича, ҳарбийларга Венесуэлага ҳужум содир бўлган тақдирда турли ҳудудларга тарқалиб, яшириниш буюрилган.
Иккинчи вариант — мамлакатда анархия ҳолати, яъни оммавий тартибсизликларни юзага келтиришдан иборат. Мазкур режа АҚШ Венесуэлага ҳаво ёки қуруқликдан ҳужум қилганда, пойтахт Каракасда оммавий тартибсизликларни ташкил этиш ҳамда мамлакатни бошқариб бўлмайдиган маконга айлантириш учун разведка хизматлари ва ҳукмрон партиянинг қуролланган тарафдорларидан фойдаланишни назарда тутади.
«Қўшма Штатлар Венесуэла аскарларининг ҳарбий хизматдан бўйин товлашига ҳам умид қилиши мумкин. Венесуэлалик ҳарбийлар ҳукуматдан ойига тахминан 100 доллар маош олади, бу эса ўртача бир оиланинг асосий эҳтиёжларини қоплаш учун зарур бўлган маблағнинг тахминан бешдан бир қисми холос. Бундай ҳолат можаро юзага келганда ҳарбий хизматдан бўйин товлаш хавфини оширади», дея ёзмоқда Reuters.
Эслатиб ўтамиз, кеча АҚШ президенти Доналд Трамп Венесуэланинг ҳаво макони ёпилганини эълон қилган эди.
