Йўғ-э! Адашдик денглар!..
Ўзбекистон миллий терма жамоаси ва Эроннинг «Истиқлол» клуби қанот ҳужумчиси Жалолиддин Машарипов жарроҳлик амалиётини ўтказади. Бу ҳақда спорт инсайдерлари хабар бермоқда.
Маълумотларга кўра, футболчи олти ой ўтгач операцияга рози бўлган. Ўтган йил июль ойида Машарипов клуб сафидаги ўйин давомида тиззасидан жароҳат олган эди. Ўшанда эронлик шифокорлар унга операция қилишни тавсия этишган, аммо футболчи жарроҳлик амалиётидан воз кечиб, консерватив даволаниш усулини танлаган.
Афсуски, тиззадаги ноқулайлик бартараф этилмаган ва энди футболчи операция ўтказишга мажбур. Агар тикланиш жараёни чўзилиб кетса, Машарипов Жаҳон чемпионатини ўтказиб юбориш хавфи остида қолмоқда. 32 ёшли футболчи катта эҳтимол билан асосий мусобақа — Жаҳон чемпионатига тайёргарлик кўриш мақсадида операцияни кечиктириб келган.
Эслатиб ўтамиз, аввалроқ Ўзбекистон миллий терма жамоасининг асосий марказий ҳимоячиси Ҳусниддин Алиқуловнинг оғир жароҳат олгани ҳақида хабар берилган эди. У Жаҳон чемпионатида иштирок эта олмайди.
