Кимдир шу урушда ҳам пул ишлаяпти…
The Wall Street Journal нашрининг хабар беришича, Трамп маъмурияти Бирлашган Араб Амирликларига (БАА) қарийб 7 миллиард долларлик қўшимча қурол-яроғ сотилишини маъқуллади. Эътиборли жиҳати шундаки, АҚШнинг қурол экспортини тартибга солувчи амалдаги қоидаларига кўра, Давлат департаменти ушбу келишув ҳақида жамоатчиликка расмий баёнот бериши шарт эмас. Бу маблағ аввалроқ эълон қилинган, Яқин Шарқдаги учта давлатга сотиладиган 16,5 миллиард долларлик ҳарбий пакетга қўшимча бўлиб, бир куннинг ўзида минтақага йўналтирилган шартномаларнинг умумий қийматини 23,5 миллиард доллардан ошириб юборди.
АҚШ мулозимларига таяниб берилган тафсилотларга кўра, ошкор этилмаган ушбу янги битим таркибидан 5,6 миллиард долларлик “Patriot PAC-3” ракета тизимлари ҳамда қарийб 1,32 миллиард долларлик “CH-47 Chinook” оғир транспорт вертолётлари жой олган. Нашрнинг тушунтиришича, мазкур савдолар аввал тузилган ва маъқулланган қурол битимларининг кенгайтирилган қисми бўлгани сабабли, уларни алоҳида оммага эълон қилиш зарурати туғилмаган. Бу қадам АҚШнинг минтақавий иттифоқчилари, хусусан, Эрон билан давом этаётган уруш фонида БААнинг ҳаво ҳужумидан мудофаа салоҳиятини ва логистик имкониятларини кучайтиришга қаратилган стратегик юриши сифатида баҳоланмоқда.
