ИЛОН МАСК ТУЗОҚҚА ТУШДИ!..
МИЛЛИАРДЕР Twitter ИНВЕСТОРЛАРИНИ АЛДАГАНЛИКДА АЙБДОР ДЕБ ТОПИЛДИ!
Америкалик машҳур миллиардер Илон Маск учун қора кунлар бошланди. Сан-Франциско суди присяжнийлари Маскни Twitter компаниясини сотиб олишдан олдин инвесторларни атайлаб чалғитиш ва платформа обрўсига путур етказишда айбдор деб топди. Бу ҳақда Bloomberg агентлиги хабар бермоқда.
Нима содир бўлди?
Тергов хулосасига кўра, 2022 йилда Маск ижтимоий тармоқдаги «фейк» аккаунтлар сони ҳаддан ташқари кўплиги ҳақида бонг уриб, келишув нархини пасайтиришга уринган. Унинг бу баёнотлари акциялар нархининг кескин тушиб кетишига ва инвесторларнинг катта миқдорда зарар кўришига сабаб бўлган.
Маск қанча тўлайди?
Суд қарорига кўра, эндиликда Маск жабрланган акциядорларга юзлаб миллион, ҳатто миллиардлаб доллар товон пули тўлаши мумкин. Узил-кесил сумма акциядорларнинг алоҳида даъво аризалари кўриб чиқилгандан сўнг маълум бўлади.
Эслатиб ўтамиз: Илон Маск Twitter’ни 2022 йил октябрида 44 миллиард долларга сотиб олган эди. Шундан сўнг у компания раҳбариятини алмаштириб, ходимларнинг ярмидан кўпини бўшатган. 2023 йил июлида эса тармоқ номини X деб ўзгартирган эди.
Эндиликда дунёнинг энг бой одамларидан бири ўз манипуляциялари учун рекорд даражадаги жаримага тортилиши кутилмоқда.
