Олтин нархи кескин тушди: бир неча соатда триллионлаб йўқотиш!
Жаҳон бозорида олтин нархи кутилмаган тарзда пасайиб, $4,350 даражасидан ҳам пастга тушди. Бу эса қисқа вақт ичида улкан молиявий йўқотишларга сабаб бўлди.
Маълумотларга кўра, атиги уч соат ичида олтин бозорининг умумий қиймати $1 триллиондан ортиққа камайган. Бу ҳолат инвесторлар ва таҳлилчилар орасида катта муҳокамаларга сабаб бўлмоқда.
Қизиғи шундаки, одатда геосиёсий кескинлик ва уруш хавфи кучайган пайтларда олтин нархи ошиши кузатилади. Бироқ бу гал вазият аксинча ривожланмоқда — нархлар пасайишда давом этмоқда.
Эслатиб ўтамиз, АҚШ ва Исроил томонидан Эронга эҳтимолий зарба ҳақида хабарлар тарқалишидан олдин олтин нархи $5,600гача кўтарилиб, тарихий рекордни янгилаган эди.
Ҳозирги кескин тушиш эса бозордаги ноаниқлик ва инвесторлар кайфияти ўзгариб бораётганини кўрсатмоқда.
