Трамп: «Керак! Керак!! Керак!!! Мен Эронни нефтини тортиб олишим керак!!!»
Дональд Трамп Эрон нефтини қўлга киритиш истагида эканини маълум қилди, бироқ буни айнан қандай амалга оширишига аниқлик киритишдан бош тортди.
«Тўғрисини айтсам, мен энг кўп Эрон нефтини олишни хоҳлаган бўлардим. Лекин АҚШдаги баъзи аҳмоқлар: «Буни нима учун қиляпсиз?» деб сўрашади. Улар — аҳмоқлар», — деди Трамп «Air Force One» бортида Financial Times мухбирига. У вазиятни Венесуэла билан қиёслади (у ерда АҚШ президент Мадурони қўлга олиб, нефть устидан назорат ўрнатган эди).
Ушбу сўзлар Форс кўрфази ҳудудига минглаб америкалик аскарлар етиб келган бир пайтда янгради. Ҳозирча бунинг мақсади номаълум, бироқ натижада нефть нархи янада кўтарилди: кеча Осиё биржаларида Brent маркали нефть баррели 116 доллардан сотилди.
Трамп Эрон нефтини жўнатишдаги асосий терминал — Харк оролини эгаллаш режаси бор-йўқлиги ҳақидаги саволга жавоб бермади. «Балки биз Харкни олармиз, балки йўқ. Бизда вариантлар кўп. У ерда (Харк оролида) бир муддат қолишимиз ҳам истисно эмас», — деди президент.
Эрон нефть қазиб олиш соҳасини эгаллаб олиш таҳдидларига қарамай, Трамп АҚШ ва Эрон ўртасида Покистон воситачилигида кечаётган билвосита музокаралар яхши кетаётганини таъкидлади. Яқин кунларда Ҳормуз бўғозини очиш имконини берувчи ўт очишни тўхтатиш келишувига эришиш эҳтимоли ҳақидаги саволга Трамп аниқ тафсилотларни ошкор қилмади.
«Бизда 3000 га яқин нишон қолди. Биз аллақачон 13 000 та нишонни урдик. Яна бир неча мингта нишон қолди. Келишув жуда тез тузилиши мумкин», — деб хабар берди Трамп.
Президент Эрондаги режим алмашинуви ҳақидаги яқинда берган баёнотига ҳам изоҳ берди: «Бир режим йўқ қилинди, вайрон этилди, унинг барча аъзолари ўлди. Кейинги режим деярли ўлди, учинчи режимда эса биз мутлақо бошқача одамлар билан ишлаяпмиз… ва очиғини айтсам, улар ўзларини жуда оқилона тутмоқдалар. Бу — ҳақиқий режим алмашинуви. Бундан яхшироқ қилиш имконсиз», — деди Трамп журналистларга.
Бироқ, кўп ўтмай Трамп ўзининг Social Truth ижтимоий тармоғида Эронда кўплаб нишонлар йўқ қилинганини ёзиб қолдирди: «Эронда муҳим кун. Кўпдан бери кутилган нишонлар дунёдаги энг буюк ва энг ҳалокатли АРМИЯМИЗ томонидан йўқ қилинди. Барчангизни Худо асрасин!»
