Дональд Трамп Эронга қарши кескин баёнот билан чиқди: «Бундай зарба ҳеч бир давлатга берилмаган»
АҚШ президенти Дональд Трамп CBS News телеканалига берган интервьюсида Эрон билан музокаралар жараёни муваффақиятсизликка учраса, Теҳронга нисбатан мисли кўрилмаган ҳарбий чоралар кўрилиши мумкинлигидан огоҳлантирди.
Трампнинг сўзларига кўра, агар икки мамлакат ўртасида ўзаро мақбул келишувга эришилмаса, вазият кескинлашади. «Агар келишувга эришилмаса, шундай ҳолат юзага келадики, унда бирор мамлакат илгари бу қадар қаттиқ зарбага учрамаган бўлади», — дея таъкидлади АҚШ раҳбари.
Ҳозирда АҚШ ва Эрон ўртасидаги дипломатик жараён ҳал қилувчи паллада турибди. Вашингтон Эроннинг ядровий дастурини чеклаш ва минтақавий хавфсизликни таъминлаш бўйича қатъий талабларни илгари сурмоқда. Ўз навбатида, Трамп маъмурияти бир вақтнинг ўзида ҳам дипломатик мулоқотни давом эттирмоқда, ҳам ҳарбий босимни кучайтиришга тайёрлигини билдириб келмоқда.
