Эйфел минорасининг бир қисми аукционда деярли 450 минг еврога сотилди — DW
Нашрнинг ёзишича, гап миноранинг тарихий зинапояси бўлаги — баландлиги тахминан 2,7 метр ва вазни қарийб 1,4 тонна бўлган, 14 та пиллапоядан иборат секция ҳақида бормоқда. Бу зинапоя иншоотнинг иккинчи ва учинчи қаватларини боғлаб турган. Муҳандис Гюстав Эйфел ўз минорасини лойиҳалаштирган 1889 йилги Бутунжаҳон кўргазмаси ташриф буюрувчилари айнан мана шу айланма зинапоя орқали юқорига кўтарилишган. Кейинчалик бу минора Париж рамзига айланди.
1983 йилда миноранинг иккинчи ва учинчи қаватлари орасидаги зинапоя ўта хавфли деб топилиб, демонтаж қилинган ва замонавий лифтларга алмаштирилган. Шундан сўнг конструкция 24 қисмга бўлиб юборилган. Бугунги кунда уларнинг айрим парчалари Нью-Йоркдаги Озодлик ҳайкали яқинида, Япониядаги музейлар ва хусусий боғларда, биттаси эса Диснейлендда сақланмоқда.
