Ўзбекистондан Россияга яширинча 446 та қимматбаҳо тош олиб борган эркак 10 ойга қамалди

Россиянинг Домодедово аэропортида Ўзбекистондан учган йўловчининг юки, чўнтаклари ва ички кийимидан 2,5 млн рубль қийматидаги зумрад ва бошқа тошлар топилди. Суд контрабандада айбланган 54 ёшли эркакни манзил-колонияда 10 ойлик қамоқ жазосига ҳукм қилди.

Ўзбекистондан Россияга учиб борган 54 ёшли эркакнинг юклари орасидан 446 дона қимматбаҳо ва ярим қимматбаҳо тошлар топилди, деб ёзмоқда ТАСС Россия Федерал божхона хизмати (ФБХ)га таяниб.

Қайд этилишича, Домодедово аэропорти божхоначилари эркакни яшил йўлакда тўхтатган. Инспекторлар унинг чемоданидан рентген ускунаси ёрдамида 32 дона яшил рангли тошни топган. «Чет эл фуқароси жинси шимининг чўнтакларидан металл пластина билан бирга яна турли шакл, ранг ва ҳажмдаги 313 та минерални чиқариб берди. Эркакнинг ички кийимидан эса ичида яна 101 та тош бўлган зип-пакет топилган», — деб хабар берди ФБХ.

Таъкидланишича, йўловчи қимматбаҳо тошларни ўзининг заргарлик фирмаси учун намуна сифатида олиб келаётганини ва декларация тўлдириш зарурлиги ҳақида билмаганини тушунтирган. ФБХ экспертизаси ушбу пластина 960 пробали кумушдан ясалганини, минераллар эса зумрад, апатит, турмалин ва синтетик муассанитлар эканини аниқлаган.

Товарларнинг умумий қиймати 2,5 миллион рубль (32,2 минг доллар)ни ташкил этади. Суд йирик ҳажмдаги стратегик муҳим ресурслар контрабандаси бўйича жиноят иши юзасидан эркакка манзил-колонияда 10 ой муддатга озодликдан маҳрум қилиш жазосини тайинлади.