Сўровнома: америкаликларнинг 64 фоизи Трамп сиёсатидан норози
АҚШ президенти Дональд Трамп фаолиятини қўллаб-қувватлаётган америкаликлар улуши 33 фоизгача камайди. «Reuters» агентлиги Ipsos халқаро тадқиқот компанияси ўтказган сўровнома натижаларига таяниб хабар беришича, бу Трампнинг иккинчи президентлик муддати бошланганидан буён қайд этилган энг паст кўрсаткич ҳисобланади.
Тадқиқот иштирокчиларининг 64 фоизи президент олиб бораётган сиёсатни маъқулламаслигини билдирган. Қолган респондентлар эса бу масалада аниқ позицияга эга эмаслигини кўрсатган.
Сўров давомида АҚШ ва Эрон ўртасидаги кескинликка ҳам алоҳида эътибор қаратилган. Респондентларнинг 80 фоизи икки давлат ўртасидаги зиддият узоқ муддат давом этиши мумкин, деб ҳисобламоқда. Фақат 16 фоиз иштирокчи вазият бир неча ҳафта ичида юмшашига ишонч билдирган.
Маълумотларга кўра, Трампнинг иккинчи президентлик давридаги энг юқори рейтинги 2025 йил январь ойида қайд этилган. Ўшанда унинг фаолиятини америкаликларнинг 47 фоизи маъқуллаган. Кейинги даврда бу кўрсаткич пасайиб борган бўлса-да, аввал 34 фоиздан пастга тушмаган.
34 фоизлик рейтинг жорий йилнинг апрель ва июнь ойларида ҳам қайд этилган эди. Трампнинг биринчи президентлик муддатида ҳам шунга яқин ҳолат кузатилган: 2017 йил декабрида унинг қўллаб-қувватланиш даражаси 33 фоизгача пасайган.
«Ipsos» сўровномаси 14–17 август кунлари АҚШ бўйлаб 1166 нафар вояга етган фуқаро иштирокида ўтказилган.
