Ноқонуний миграцияни ташкил этганлик учун 15 йилгача қамоқ жазоси таклиф этилмоқда
Ўзбекистонда ноқонуний миграцияни ташкил этганлик учун жиноий жавобгарлик белгилаш таклиф этилмоқда.
Бу ҳақдаги қонун лойиҳаси Норматив-ҳуқуқий ҳужжатлар лойиҳалари муҳокамаси порталига жойлаштирилди.
Лойиҳа билан Жиноят кодексига «Ноқонуний миграцияни ташкил этиш» деб номланган янги 223¹-моддани киритиш таклиф этилмоқда.
Унга кўра, иқтисодий манфаат кўриш мақсадида қонунчиликда белгиланган миграцияни ташкиллаштириш тартибини бузган ҳолда ноқонуний миграцияни ташкил этиш, унга раҳбарлик қилиш ёки кўмаклашиш жиноий жавобгарликка сабаб бўлиши мумкин.
Бунда транспорт воситаси ёки турар жой тақдим этиш орқали чет эл фуқаролари, фуқаролиги бўлмаган шахслар ёки Ўзбекистон фуқароларини белгиланган тартибни бузган ҳолда мамлакатга олиб кириш, давлат чегарасидан олиб ўтиш, чет элга олиб чиқиш ёки Ўзбекистон ҳудуди орқали транзит тарзида бошқа давлатга ноқонуний ўтиши ёки мамлакатдан чиқиб кетишига қаратилган фаолиятни ташкил этиш ҳам қамраб олинади.
Қонун лойиҳасида бундай қилмиш учун 3 йилдан 5 йилгача озодликни чеклаш ёки озодликдан маҳрум қилиш жазоси белгиланиши таклиф этилмоқда.
Агар ҳаракат:
кўп миқдорда;
бир гуруҳ шахслар томонидан;
мансабдор шахслар томонидан;
такроран ёки хавфли рецидивист томонидан;
уюшган гуруҳ томонидан ёки унинг манфаатларини кўзлаб содир этилса,
5 йилдан 10 йилгача озодликдан маҳрум қилиш жазоси қўлланиши мумкин.
Ноқонуний миграция:
жуда кўп миқдорда;
ҳаёт ёки соғлиқ учун хавфли усулда амалга оширилса;
бошқача оғир оқибатларга сабаб бўлса,
10 йилдан 15 йилгача озодликдан маҳрум қилиш жазоси таклиф этилмоқда.
Шунингдек, Жиноят-процессуал кодексига мазкур жиноят бўйича дастлабки терговни ички ишлар органлари тергови юритиши ҳақидаги қўшимча киритиш назарда тутилган.
Қонун лойиҳаси муаллифларига кўра, янги нормаларни жорий этишдан мақсад ноқонуний миграциянинг олдини олиш, унга қарши курашиш ҳамда бу соҳадаги жиноятлар учун жавобгарликнинг муқаррарлигини таъминлашдан иборат.
