Мозори Шариф Ўзбекистон электр тизимига вақтинча уланди
Афғонистоннинг Мозори Шариф шаҳрида электр таъминоти билан боғлиқ вазиятни барқарорлаштириш мақсадида Ўзбекистондан вақтинчалик электр энергияси узатилмоқда.
«Da Afghanistan Breshna Sherkat» (DABS) маълум қилишича, Туркманистонда юзага келган техник носозлик туфайли Афғонистонга импорт қилинаётган электр энергияси етказиб беришда узилиш содир бўлган. Бу ҳолат мамлакатнинг еттита вилоятида электр таъминотига таъсир кўрсатган.
Муаммони қисқа муддатда бартараф этиш учун Афғонистон томони Ўзбекистон билан музокаралар ўтказган. Натижада Ўзбекистон зарар кўрган ҳудудларни муқобил электр энергияси билан таъминлашга ёрдам беришга розилик билдирган.
Шу асосда Мозори Шарифдаги электр тармоғи Ўзбекистон энергетика тизимига вақтинча ва чекланган ҳажмда уланган. Биринчи навбатда электр энергияси аҳоли учун муҳим бўлган объектлар — Ибн Сино шифохонаси, давлат муассасалари ва бошқа стратегик иншоотларга етказиб берилмоқда.
