Трамп ва IT компаниялари раҳбарлари сунъий интеллектни назорат қилиш бўйича келишув имзолади
АҚШ президенти Дональд Трамп ва сунъий интеллект соҳасида фаолият юритувчи йирик компаниялар раҳбарлари ИИ хавфсизлигини таъминлаш ва уни назорат қилиш бўйича келишув имзолади.
Келишув Трампнинг Оқ уйда Google, Anthropic, Meta, OpenAI, Nvidia ва Илон Маскка тегишли xAI каби компаниялар раҳбарлари билан учрашувидан сўнг қабул қилинди.
Трамп ҳужжатни ўзининг Truth Social ижтимоий тармоғида эълон қилди. Келишувга кўра, компаниялар сунъий интеллект моделларининг имкониятларини назорат қилиш ҳамда уларнинг хавфсизлик стандартларига мувофиқлигини баҳолаш учун ички механизмлар яратиши керак.
Бу талаблар ИИ моделларини ишлаб чиқиш ва жорий этиш жараёнида, жумладан, киберхавфсизлик, биологик ва кимёвий хавфсизлик соҳаларида қўлланиши кутилмоқда. IT компаниялари мустақил аудиторлар билан ҳамкорлик қилиши ҳам назарда тутилган.
Трампнинг таъкидлашича, ҳозирча келишув «маънавий кучга» эга бўлиб, уни суд орқали мажбуран ижро эттириш мумкин эмас.
Шу билан бирга, ҳужжатда келажакда ушбу чораларни қонунлар ёки тегишли меъёрий ҳужжатлар билан мустаҳкамлаш зарурати пайдо бўлиши мумкинлиги қайд этилган.
