Путин туғилган кунини Германиянинг собиқ канцлери Шрёдер билан нишонлади
Россия президенти матбуот хизмати уларнинг биргаликдаги суратини эълон қилди. Кремл баёнотига кўра, Путин 7 октябр эрталаб Шрёдернинг Москвага келганини оммавий ахборот воситалари хабарларидан билган ва “эски дўсти”ни уйига таклиф қилган.
Германиянинг собиқ канцлери Москвага “Глобус” гипермаркетлар тармоғи раҳбарияти ва ходимлари билан учрашиш учун борган. Яқинда у Россиядаги Globus гипермаркетларини бошқарувчи “Гиперглобус” компанияси кузатув кенгаши аъзоси бўлган эди.
82 ёшли Шрёдернинг Россиядаги компанияда раҳбарлик лавозимини эгаллаши Германияда танқидларга сабаб бўлди. Христиан-демократик иттифоқ вакили, Бундестаг депутати Родерих Кизеветтер бу тайинловни “Европа ва ўз мамлакатига хиёнат” деб атади.
Герҳард Шрёдер Германия канцлери лавозимини 1998–2005 йилларда эгаллаган. Кейинчалик у “Роснефт” ҳамда “Шимолий оқим” газ қувури оператори — Nord Stream компанияси раҳбариятида ишлаган.
Аввалроқ Путин Германиянинг собиқ канцлери Шрёдерни “Украина бўйича мақъул музокарачи”, деб атаганди. Европа Иттифоқи, Германия ва Украина эса бу таклифни рад этганди.
