Дания мактаб ўқитувчиларига тартибни сақлаш учун ўқувчиларга нисбатан жисмоний куч ишлатишга рухсат берилиши мумкин

Данияда ўқитувчиларга муайян ҳолатларда ўқувчиларни жисмонан ушлаб туриш ёки уларнинг хоҳишига қарши синфдан чиқариш ҳуқуқини беришни назарда тутувчи қонун лойиҳаси тайёрланди. Ҳужжат ҳали парламент томонидан тасдиқланиши керак.

Дания маориф вазири Магнус Хеунике маълум қилишича, бундай чоралар ўқувчи ўзига ёки атрофдагиларга хавф туғдирганида ёхуд синфдаги тартибни жиддий бузганида қўлланилиши мумкин. Вазир бу ташаббус жисмоний жазолашни назарда тутмаслигини таъкидлади.

«Вазият кескинлашганда ўқитувчилар нима қилишга ҳақли эканликларига шубҳа қилмасликлари керак. Зўравонликнинг олдини олгани учун бирор ўқитувчи ишдан бўшатилишдан қўрқмаслиги лозим», — деди Хеунике.

Қонун лойиҳасини ишлаб чиқишга Дания мактабларида ўқувчиларнинг тажовузкор ва бузғунчи хатти-ҳаракатлари кўпайгани ҳақидаги хабарлар сабаб бўлган.

Дания меҳнат инспекцияси ўтказган тадқиқотга кўра, сўровда қатнашган ўқитувчиларнинг чорак қисмидан кўпроғи ўқувчиларнинг бундай хатти-ҳаракатларига аввалгидан кўпроқ дуч келаётганини билдирган.

Тадқиқот натижаларига кўра, тахминан ҳар бешта синфдан бирида зўравонлик ҳолатлари ўқитувчиларга нисбатан содир этилмоқда.