Путин Кремлда Эрон Олий миллий хавфсизлик кенгаши котиби билан учрашди
Россия президенти Владимир Путин Кремлда Эрон Олий миллий хавфсизлик кенгаши котиби Моҳсен Резаини қабул қилди. Бу ҳақда Кремл вакили Дмитрий Песков маълум қилди.
IRIB маълумотларига кўра, Эрон хавфсизлик кенгаши котиби Россия президентига ислам республикаси олий раҳнамоси Можтаба Хоманаийнинг мактубини етказган.
Душанба куни Путин ва Резаи телефон орқали мулоқот қилиб, Яқин Шарқдаги вазиятни муҳокама қилган эди. Эронлик сиёсатчи Теҳронни қўллаб-қувватлаётгани учун миннатдорлик билдирди. Бундан ташқари, томонлар келгусида ҳам стратегик ҳамкорликни давом эттиришга содиқликларини тасдиқладилар.
Аввалроқ Эрон президенти Масуд Пезешкиан Можтаба Хоманаий ҳукуматга Қўшма Штатлар билан можарони мулоқот орқали ҳал қилиш ваколатини берганини айтган эди. Россия эса инқирозни бартараф этишда ўз кўмагини таклиф қилган.
Сентябрь ойи охирида Эрон АҚШга Ҳормуз бўғизини очиш бўйича етти кунлик режани ўз ичига олган таклифларни юборган эди, бунга жавобан эса денгиз блокадаси ва экспорт чекловларини олиб ташлаш талаб қилинганди. Оқ уй раҳбари Трамп буни рад этган.
Душанба куни республика ташқи ишлар вазири Аббос Арақчи режани бажаришнинг тахминий муддатини икки суткагача қисқартиришга муваффақ бўлганини, энди ҳамма нарса Америка томонининг жавобига боғлиқ эканини маълум қилди.
