Nvidia раҳбари хитойлик жосус аёл билан ишқий муносабатда бўлган – АҚШ разведкаси
Қўшма Штатлар ҳукумати Nvidia бош директори Женсен Хуанг Хитой Давлат хавфсизлиги вазирлиги томонидан ёлланган аёл билан ишқий муносабатларда бўлган деб ҳисоблайди. Гап Nvidia маҳсулотларини сотиб олувчи Сингапурнинг Megaspeed компанияси топ-менежери Элис Хуанг ҳақида бормоқда.
Америка разведкаси маълумотлари асосидаги меморандум мулозимлар томонидан жорий йилда тайёрланган. Ҳужжат АҚШ мрезиденти Доналд Трампнинг Хитой раиси Си Жинпин билан саммит учун Пекинга ташрифидан сал олдин Оқ уй маъмуриятининг тор доирадаги юқори мартабали вакилларига топширилган. Аввалроқ Nvidia компанияси Женсен Хуанг ҳар йили минглаб мижоз-фирмалар раҳбарлари билан учрашишини маълум қилганди.
2023 йилда Хитой ўйин компаниясидан ажралиб чиққан Megaspeed АҚШ ҳокимияти экспорт чекловларини айланиб ўтиб, Nvidia’нинг илғор чипларини Хитойга контрабанда қилишда гумонламоқда. Nvidia’нинг ички текшируви эса ҳеч қандай ҳуқуқбузарликни аниқламаган. Маълумотларга кўра, миллий хавфсизлик учун масъул бўлган ммерикалик мулозимлари Хуангдан норози, чунки у жорий йилда Трампни Хитой мижозларига H200 сунъий интеллект чипларини сотишга шахсан кўндирган.
Жорий йилнинг 29 октябр куни The New York Times нашри АҚШ разведкаси хулосаларига таяниб, Элис Хуанг Пекинга маълумот узатгани ва Nvidia раҳбари Хитой жосуслик операциясининг нишонига айлангани ҳақида хабар берган. Газета маълумотларига кўра, Трампга бу ҳақда тахминан бир йил олдин ахборот берилган, аммо у ҳеч қандай чора кўрмаган. Nvidia Хуангнинг Megaspeed вакили билан алоқаларини одатий бизнес амалиёти, Хитой ТИВ эса “асоссиз уйдирмалар” деб атаган.
