ФИФА президентининг Жаҳон чемпионати бўйича режалари ўзгарди
ФИФА президенти Жанни Инфантино Жаҳон чемпионати ва клублар ўртасидаги мундиал иштирокчилари сонини ошириш ғоясини илгари сурмасликка қарор қилди. Бу ҳақда The Times нашри хабар бермоқда.
Манбага кўра, Инфантино олтита қитъа футбол конфедерацияси раҳбарларига келгуси сайловда қайта сайланган тақдирда, мазкур мусобақаларни кенгайтириш ташаббуси билан чиқмаслигини билдирган.
Аввалроқ 2030 йилги Жаҳон чемпионати иштирокчилари сонини 64 тага етказиш таклифи муҳокама қилинган эди.
Бу қарор ФИФА атрофидаги молиявий келишмовчиликлар фонида қабул қилинмоқда. Жумладан, ташкилот тижорат ҳуқуқлари ва турнирларни бошқариш фаолиятини бирлаштирувчи FIFA Forward Enterprise компаниясини ташкил этиш ҳамда унинг улушларини хусусий инвесторларга сотишни режалаштирганди.
Бироқ мазкур ташаббус УЕФА ва Европа клубларининг кескин қаршилигига учради. Айрим жамоалар ФИФА мусобақаларини бойкот қилиш билан таҳдид қилгач, лойиҳа бекор қилинди.
Эслатиб ўтамиз, Инфантино 2016 йилдан буён ФИФА президенти ҳисобланади. У 2027 йил март ойида ўтказиладиган навбатдаги президентлик сайловида ҳам иштирок этишни режалаштирмоқда.
