Москва Боку ва Ереванни вазминликка чақирди
Россия Озарбайжон ва Арманистонни максимал даражада вазминликка ва тажовузкор риторикадан қочишга чақиради ва барча ҳудудий низолар ва ўзаро даъволар фақат сиёсий ва дипломатик доирада ҳал қилиниши керак.
Бу ҳақда Россия ТИВ расмий вакили Мария Захарова чоршанба куни бўлиб ўтган брифингда маълум қилди, дея хабар беради Россия матбуоти.
«Бундай масалалар, жумладан, анклавларни қайтариш ва алмашиш Арманистон-Озарбайжон чегарасини делимитация қилиш бўйича икки томонлама комиссия доирасида ҳал этилиши керак. Биз, ўз навбатида, Россияда мавжуд бўлган ноёб картографик материаллар ва тажрибани ҳисобга олган ҳолда, бу ишга максимал даражада ёрдам беришга тайёрмиз», — деди Захарова.
Унинг сўзларига кўра, худди шундай тамойиллар Арманистон ва Озарбайжон ўртасидаги транспорт коммуникацияларини блокировка қилишда ҳам амал қилади.
Захарованинг сўзларига кўра, муросага келишнинг яхши йўлга қўйилган механизми – бу Россия, Озарбайжон ва Арманистон бош вазирлари ўринбосарларидан иборат уч томонлама ишчи гуруҳ.
Россия ТИВ вакилининг қайд этишича, 2023 йилдаги сўнгги учрашувда томонлар минтақадаги транспорт ва иқтисодий йўналишларни блокдан чиқариш бўйича ўзаро манфаатли кенг қамровли қарор қабул қилишга яқин турган.
Захарова, шунингдек, томонларни сиёсий ирода кўрсатишга ва «ўрнатилган уч томонлама форматларда, жумладан, уч томонлама ишчи гуруҳда» ўзаро ҳамкорликни тиклашга чақирди.
