Россияда SIM-карта сотиб олиш шартлари кучайтирилади
Мобил алоқадан фойдаланган ҳолда фирибгарлик ва бошқа жиноятлар содир этиш эҳтимолини камайтиришга қаратилган қонун лойиҳаси Россия Давлат Думасига киритилди. Бу ҳақда лойиҳа муаллифларидан бири, депутат Василий Пискарев хабар берди.
Қонун лойиҳасида чет элликлар учун SIM-карта олиш шартлари янада кучайтирилади. Энди улар Интернет орқали эмас, фақат алоқа дўконлари ва савдо нуқталарида Ягона биометрик тизимдан фойдаланган ҳолда мобил алоқа учун шартнома туза олади.
Бир нафар чет эл фуқаросига 10 дан ортиқ рақам берилиши тақиқланади. Бундан ташқари, SIM-карта мижоз қурилмасининг IMEI кодига (телефон, планшет, ноутбук идентификация коди) бириктириб қўйилади, шу туфайли SIM-картани бошқа қурилмага кўчириш имконсиз бўлади.
