КХДР иккита баллистик ракета учирди
Душанба куни Шимолий Корея шимоли-шарқий йўналишда иккита баллистик ракета учирди. Учиришлардан бири муваффақиятсиз бўлиши мумкин, деб ёзади Yonhap.
Штаб бошлиқларининг бирлашган қўмитаси (JCS) қисқа масофали баллистик ракета Хванхэ-Намдо провинциясидан эрталаб соат 5:05 атрофида учирилганини, тахминан 600 километр учиб ўтганини ва шимоли-шарқдаги Чхонжин шаҳри яқинидаги сувларга қўнганини айтди.
Яна бир баллистик ракета худди шу ҳудуддан эрталаб соат 5:15 атрофида учирилди ва 120 километрга яқин учди.
JCS полковниги Ли Сон Чжуннинг айтишича, иккинчи ракета эрта отилган бўлиши мумкин ва агар у ҳавода портлаган бўлса, қолдиқлар Шимолий Корея тупроғига тушиши мумкин.
Учириш чоршанба куни Шимолий Корея Япония денгизига (Шарқий) баллистик ракета учирганидан беш кун ўтиб амалга оширилди. Эртаси куни мамлакат муваффақиятли синов ўтказганини маълум қилди, бироқ Жанубий Корея буни “сохта учириш” деб атади, чунки ракета ҳавода портлагани сабабли учириш муваффақиятсиз тугади.
