Милиция ходими калтакланди
Самарқанд вилоятининг Оқдарё туманида милиция инспектори калтакланди, деб хабар бермоқда вилоят ИИБ матбуот хизмати.
Аниқлик киритилишича, 23 июль куни соат 17:30 атрофида ҳуқуқ-тартибот идораларига эркак мурожаат қилган. Мурожаатга кўра, номаълум шахслар уни калтаклаган ҳамда «Nexia-3» русумли автомашинасининг ойналарини синдирган.
Шундан сўнг, воқеа жойига инспектор В.Б. етиб келган ва қоида бузарларни маҳкамага олиб кетган. Аммо шу пайт (35 ёшли эркак, 19 ёшли йигит ва 40-50 ёшли аёл) инспекторга аслида улар билан биринчи суҳбат ўтказиши керак эканлигини айтиб, жанжал келтириб чиқарган.
Натижада, милиция ходими фуқаролардан аралашмасликни ва навбат билан гапиришни сўраган. Бунга жавобан фуқаролар уни ҳақорат қилиб, бинодан чиқиб кетишган.
Инспектор уларнинг ортидан бориб, тушунтириш хати олиши керак бўлгани учун кетмасликларини сўраган. Аммо аёл ҳуқуқ-тартибот идораси ходимини кийимидан тортган, ёнида тўрган эркак ва йигит эса уни калтаклаган. Шундан сўнг уч нафар ҳуқуқбузар машинага ўтириб, воқеа жойидан қочиб кетишган.
Мазкур ҳолат юзасидан Жиноят кодексининг 277-моддаси 3-қисми «г» банди (жамоат тартибини муҳофаза қилиш бўйича вазифаларни бажараётган ҳокимият вакилига безорилик хатти-ҳаракатларини содир этиш) билан жиноят иши қўзғатилиб гумонланувчилар қўлга олинган.
