АҚШ Украинага берган ваъдасини бажармади
Жо Байден президентлигининг сўнгги йилида АҚШ Украинага қурол-яроғ етказиб беришни кескин камайтирди: ноябрь ойига келиб, Вашингтон Киевга ваъда қилинган ёрдамнинг атиги ярмини ўз қурол-аслаҳа захираларидан ажратгани ҳақида Reuters агентлиги Америка ва Украина манбаларига таяниб хабар берди.
Сентябргача етказиб бериш ойига ўртача 558 миллион долларни ташкил этган. Фақатгина 2024 йил октябридан 2025 йил 20 январигача, яъни президент Доналд Трампнинг қасамёд маросимигача бўлган даврда, ойлик ёрдам кўрсаткичи 1,1 миллиард долларга етди. Бироқ, ёрдамни кескин ошириш ҳақида гап бўлмади – бу урушнинг дастлабки икки йилида ўрнатилган даража эди, холос. Шу билан бирга, декабрь ойига келиб АҚШ Украинага ваъда қилинган зирҳли техниканинг атиги 30 фоизини етказиб берган.
2023 йил декабрь ойида Байден АҚШнинг «Украинанинг урушдаги ғалабасини» хоҳлашини айтган эди. Бироқ, Reuters хабар беришича, Оқ уй бу баёнот Вашингтоннинг 2014 йилдан бери Россия томонидан босиб олинган барча ҳудудларни озод қилишда Киевга ёрдам беришга тайёрлиги бўйича нореал умидларни келтириб чиқариши мумкинлигидан хавотирда эди.
Агентлик манбалари маълум қилишича, 2024 йилда Украинага ҳарбий ёрдам етказиб бериш бўйича қарорлар бир неча ойлик кечикишлар билан қабул қилинган. Бунга нафақат 60 миллиард долларлик пакетни узоқ вақт давомида тасдиқламаган Конгрессдаги тўхтаб қолишлар, балки Оқ уйдаги Россия билан муносабатларнинг кескинлашуви хавфи ва АҚШда қурол-яроғ захиралари етарлилиги ҳақидаги ички баҳслар ҳам сабаб бўлган. Вазиятни қурол-яроғ етказиб беришни кузатишнинг яхши ташкил этилмаган тизими янада мураккаблаштирган, чунки бир идора иккинчисининг фаолияти билан таниш бўлмаган.
