Россия Украинанинг муҳим фойдали қазилмаларига кўз тикмоқда
Россия, АҚШ президенти Дональд Трамп сингари, Украинанинг табиий бойликларига эришишни истайди ва унинг қўшинлари улкан литий конига тобора яқинлашмоқда.
Трамп шу ойда Киевдан АҚШнинг ҳарбий ёрдами эвазига ўзининг қимматбаҳо минералларини катта миқдорда беришини талаб қилди. Бунга жавобан Украина президенти Владимир Зеленский «Келинг, келишайлик» деган фикрни билдирди.
Бироқ Вашингтон ва Москва уч йиллик урушни тугатиш мақсадида музокараларга тайёргарлик кўраётган бир пайтда, аслида Владимир Путин Украина бойликларини тобора кўпроқ ўз назорати остига олмоқда.
Украина Deep State ҳарбий блогининг очиқ манбалардан олинган маълумотларига кўра, аллақачон Украинанинг бешдан бир қисмини, шу жумладан нодир ер элементлари захираларини эгаллаб олган Россия қўшинлари ҳозирда Шевченко литий конидан атиги 6,5 километр нарида жойлашган ва унга уч томондан яқинлашмоқда.
«Ҳозирги жанг майдонидаги вазиятни ҳисобга олсак, кейинги ҳафталар ичида руслар бу ҳудудга етиб келиши эҳтимолдан холи эмас,» – деди Польшадаги Рочан ҳарбий маслаҳатхонаси директори Конрад Музыка. У яқинда Украинадан тадқиқот сафаридан қайтган эди.
Музыканинг таъкидлашича, гарчи Украинанинг табиий бойликларини қўлга киритиш урушнинг асосий мақсади бўлмаса-да, бу Россиянинг стратегик режаларидан бири ҳисобланади.
