АҚШ Польшадаги ҳарбий контингентини кучайтириши мумкин – Анжей Дуда
«Қўшма Штатлар Польшадаги америкалик ҳарбийларни ортга қайтармайди, балки мамлакатдаги ҳарбий контингентини янада кучайтириши мумкин» — дея таъкидлади Польша президенти Вашингтонда Дональд Трамп билан учрашувидан сўнг.
«Биз алоқалар мустаҳкамланишини кутишимиз керак, чунки биз NATO’нинг ишончли иттифоқчисимиз. Польша хавфсизлиги – бу АҚШ инвестиция қиладиган фундаментал масала», – дея қўшимча килди Дуда.
У шунингдек, Варшавада АҚШ мудофаа вазири Пит Ҳегсет билан учрашганини ва Пентагон раҳбарига Польшада «Форт Трамп» яратишни таклиф қилганини эслатиб ўтди.
Вашингтонда Трамп билан учрашувдан сал олдин Дуда Украина президенти Владимир Зеленский билан телефон орқали суҳбатлашган ва унга АҚШ президенти билан ҳамкорликни давом эттиришни маслаҳат берган. «Ишончим комилки, президент Трамп глобал барқарорлик ва тинчлик учун катта масъулият ҳисси билан иш юритади», – деб ёзган эди Польша етакчиси Х ижтимоий тармоғидаги саҳифасида.
