Зеленский ўт очишни тўхтатиш шартларини айтди
Уруш ва жанговар ҳаракатларнинг тугаши фақат Украина урушнинг қайта бошланмаслигига кафолат берувчи хавфсизлик кафолатларини олгандагина мумкин бўлади. Бу ҳақда Украина раҳбари Владимир Зеленский маълум қилди.
«Буларнинг барчаси (қазилмалар бўйича) умумий тамойиллар ва келажакда 50 фоиз билан тўлдириладиган фонд яратиш истагига оид келишувдир. Аммо ҳозирча амалда ҳақиқий фонд мавжуд бўлмагани сабабли… ҳеч нарсани тўлдириб бўлмайди. Кейинги келишувга эришилмагунча у амалда бўлмайди…
Ва бу мен учун муҳим, чунки биринчи қадам ва иккинчи қадам орасида биз АҚШ билан қандай муносабатда эканлигимизни англаб олишимиз керак…
Ҳаммамиз шуни тушунишимиз керакки, шунчаки ўт очишни тўхтатиш бўлмайди – Украинада эса хавфсизлик кафолатлари йўқ. Бундай бўлмайди. Фақат шундай бўлади: уруш шундай якунланадики, биз эртага у яна бошланмаслигига ишонч ҳосил қиламиз,» – деди Зеленский.
Шу билан бирга, АҚШ Давлат департаменти раҳбари Марко Рубио АҚШ ҳукумати Украина билан нодир ер металлари бўйича келишувни ҳали якунламаганини маълум қилди.
«Мен буни тасдиқлай олмайман. Келишув устида молия вазири Бессент ишламоқда. Олган сўнгги маълумотимга кўра, биз келишувга жуда яқинмиз,» – деди у Fox News телеканалига берган интервьюсида томонларнинг барча шартларни келишиб олганини тасдиқлаш сўровига жавобан.
Илгари бир қатор Ғарб оммавий ахборот воситалари АҚШ ва Украина Украина нодир ер металларини биргаликда қазиб олиш бўйича келишув шартларини келишиб олгани ҳақида хабар берган эди.
